Hagsmunasamtök brotaþola

Guðný hefur beitt sér fyrir málefnum brotaþola, meðal annars með því að deila eigin reynslu af kynferðisofbeldi í einlægu viðtali sem vakti þjóðarathygli. Hún hefur fundað með yfirmönnum innan lögreglunnar og þingfólki til að þrýsta á um réttarbætur og var heiðursgestur í lokaþætti baráttuhópsins Öfga. Guðný er menntuð í afbrotafræði og er stjórnarformaður Hagsmunasamtaka brotaþola.

Þórdís Elva er höfundur tveggja bóka um kynbundið ofbeldi, Á mannamáli (2009) og Handan fyrirgefningar (2017). Sú fyrrnefnda var ein verðlaunaðasta bók ársins, en sú síðarnefnda vakti heimsathygli í kjölfar þess að Þórdís Elva hélt TED fyrirlestur með manni sem beitti hana kynferðisofbeldi þegar hún var unglingur. Þórdís Elva sat í stjórn Kvennaathvarfsins 2010-2014 og var kosin Kona ársins 2015 fyrir framlag sitt til jafnréttisbaráttunnar. Hún hefur einnig verið áberandi í baráttu gegn kynbundnu ofbeldi og er höfundur fjögurra fræðslustuttmynda um málefnið, þ.á m Fáðu já (2013). Þórdís Elva hefur starfað sem fréttamaður á RÚV og er einn af stofnendum Stundarinnar (nú Heimildin) þar sem hún hefur ljáð máls á kynferðisofbeldi í vinsælum pistlum.

Eygló er með MA í kynjafræði, MEd kennsluréttindi á framhaldsskólastigi og MA í hagnýtri ritstjórn og útgáfu. Kynjafræðikennari, sjálfstæður fræðari um kynbundið ofbeldi og önnur jafnréttismál, stjórnarmeðleg í félagi íslenskra kynjafræðikennara og fyrrum fræðslustýra Stígamóta. Einn fjögurra höfunda nýútgefinnar handbókar um fræðslu og forvarnir varðandi kynferðisofbeldi, ætluð kennurum og öðru starfsfólki skólakerfisins. Hönnuður endurmenntunarnámskeiðs fyrir skólastarfsfólk um fræðslu, forvarnir og viðbrögð skóla við kynbundnu ofbeldi - sem hlaut styrk úr Jafnréttissjóði sumarið 2023. Vinnur nú að rannsókn um upplifun framhaldsskólanema af getu, þekkingu og viðbrögðum skólakerfisins af kynferðisbrotum meðal ungmenna. Situr í fagteymi um kynbundið ofbeldi ungmenna - sett saman haustið 2022 í kjölfar háværra mótmæla ungmenna um getuleysi skólakerfis í málaflokknum, og í nefnd menntamálaráðuneytis um miðlæga viðbragðsáætlun framhaldsskóla varðandi kynferðisofbeldi.

Brynhildur hefur víðtæka reynslu af ofbeldisforvörnum og fjölmiðlastarfi. Hún er leikstjóri stuttmyndanna Stattu með þér og Myndin af mér, auk þess sem hún er einn handritshöfunda verðlaunamyndarinnar Fáðu já. Árið 2022 kom út bók hennar Venjulegar konur – vændi á Íslandi, sem vakti mikla athygli. Brynhildur starfaði við þáttagerð á Rás 1 2007-2015, starfaði um árabil sem blaðamaður á Fréttablaðinu og hefur undanfarin ár gert þáttaraðirnar Daðrað á jaðrinum (2019) og Ef þú giftist (2021), en hin síðarnefnda var á jóladagskrá Rásar 1.